利安魚蛋粉 (已結業)

夜晚九點幾凍凍地原本想行去食碗粥，點知想食嘅都已經落閘，見呢間寫有手轆魚麵就坐低試下，舊式小店衞生唔好要求太多，但老伙記態度幾好，似做街坊生意多。餐牌都有唔少選擇，招牌當然係手唧魚蛋，牛腩都多人嗌，仲有豬手不過咁夜想食清d, 揀咗魚麵所以就冇再叫魚蛋而配咗雲吞..魚麵係粗身未試過呢種口感幾特別，味道幾鮮有魚味，唔覺有落好多胡椒粉或味精調味，但係一試雲吞就好失望，多肥肉而且有陣“益”味(蝦唔新鮮？!) 好在個湯底幾清甜又加咗d菜，食完都冇覺得好口渴加返少少分最後雲吞冇食曬(而且仲有d厚皮痴埋一舊).. 下次如果再經過附近可能會試返魚蛋粉拼牛腩之類。