叁樓火鍋 (已結業)

前排一向好鍾意打邊爐嘅女朋友爸爸帶我地去呢間位於尖沙嘴站A2出口旁邊嘅新開樓上火鍋店「叄樓火鍋」食，整體用餐體驗非常好，向大家推薦一下。餐廳嘅裝修好古色古香，餐具都好有特色，環境都好乾淨舒適。女朋友一家都係好鍾意食蟹嘅，聽佢爸爸講，佢就係見到Openrice上邊有其他朋友喺呢度食咗個好吸引嘅松葉蟹冬瓜鍋，所以好彩嚟呢度試吓。以下係我地當晚order左嘅食物：松葉蟹冬瓜鍋：雖然隻蟹唔會話超大隻，但勝在肉質鮮甜，而且都好飽滿。由於有隻咁靚嘅蟹熬湯，個湯底當然好鮮甜啦！食到咁上下，店員會幫手處理個冬瓜。啲冬瓜吸收曬啲精華之後真係超好食呀！雞軟骨南乳雞翼：炸得好香口，味道醃得啱啱好，係令人食唔停口嘅小吃。手切牛小排：啲牛好新鮮，牛味十足，而且脂肪比例啱啱好！手工丸&餃：賣相好吸引，而我食嘅墨魚丸同埋鳳城水餃都好足料，口感彈牙，食得出真係好新鮮。蔬菜拼盤：有好幾款蔬菜，當中嘅粟米非常甜，其他菜都好fresh。鮮炸響鈴：廚房啱啱炸起，所以攞上台嘅時候仲係熱辣辣同非常香，食落去口感相當唔錯。烏冬：雖然都食得好飽，但係見到湯底咁鮮甜，所以都決定加個烏冬。啲烏冬索曬啲精華，味道絕對冇令我哋失望！