甘牌燒鵝

營業中

休息中

早排收到朋友嘅電話，佢話甘牌燒鵝出咗一品鵝煲，以後唔一定要去鏞記訂，有多個選擇。於是大家就約埋試試呢個傳說中既一品鵝煲，點知奶晒嘢，完全中伏！雖然價錢平過鏞記，但味道就真係「吃了忘不了」，肉質同味道都係劣貨首選，真係電視廣告都有講99%仿真等如100%假，明晒！ 米X嚟一星嘅食物，淘X嘅包裝問題嚟喇:一開蓋就見到隻活生生嘅螞蟻喺度爬來爬去，嘩！真係蛋白質豐富，照理成個煲都有保鮮紙密封，無可能喺運送過程中有嘢走到入去，可想言之甘牌燒鵝嘅衛生情況係有幾差，真係污糟到「攞星」。鵝煲湯底無鏞記咁濃郁，最慘係身為鵝煲嘅主角－鵝肉又鞋又韌，少啲牙力都食唔到，而且仲有雪味！食神話齋，一定係用啲汁蓋過彊屍鵝嘅雪味。鵝腸又細條又韌，以為係木乃伊抽出嚟用，鵝肝同腎都好乾好硬，之後仲吃到有毛既鵝肉，天啊！唯一讚嘅係鵝紅夠滑，可惜又唔夠入味。以往喺鏞記訂一品鵝煲食，個個都爭住吃，仲會留返啲汁第二天再煮麵食。但係甘牌燒鵝嘅鵝煲，大家食咗幾件就停晒手，啲汁好油，味又唔濃，實在唔會再有下次。