紅樓 (已結業)

Redhouse 最近開張，係openrice訂檯有7折。剛好有朋友係外國返黎，就打算帶佢黎試下。餐廳提供新派元素嘅精緻中菜，有創意點心、燒乳豬、即席切片烤全鴨等。另外更有手工雞尾酒可選。我地一行兩人，雖然切片烤全鴨真係非常超值，但係為左想試多D野食，唯有放棄啦。蟹子黑豚肉燒賣:黑豚肉好香，肥膏唔多，料都非常足，唔錯。魚子醬蝦多士:平時蝦多士就食得多，加魚子醬就真係第一次。蝦多士細細塊，入口唔太油膩，一啖一件，隻蝦都算幾大隻，非常彈牙 ，加入魚子醬後，整體口感唔錯。伴碟仲有少少沙律，食完蝦多士後食D沙律，真係份外清新。正宗酸辣羹:既然呢度出名食北京上海菜，又點可以唔試下佢D酸辣湯呢?呢度嘅酸辣湯入口酸酸地，配料都好足，味道相當正宗。清炒鮮拆蟹粉配蝴蝶包:食蟹先要識得拆蟹，之前睇過一D報導，一斤重嘅大閘蟹只能拆出約三至四兩嘅蟹粉，一般二兩蟹粉做到一道菜，絕對係粒粒皆辛苦。蟹粉炒過後以一小盎上檯，為左防止佢變凍，下面亦都有火座暖。配以貌似白饅頭嘅蝴蝶包食，味道相當夾。蒜蓉炒白菜: 食左咁多濃味野，食返碟蒜蓉炒白菜，清清地，唔係太油，為我地今晚嘅晚餐劃上完美句號。