長阪燒 (已結業)

疫情持續，短期內都無得返“鄉下”，唯有食咗當去咗，歎番餐日本料理，等自己心靈上有番啲安慰！茶碗蒸 ($18)表面光滑，入口柔嫩順滑，口感細膩，入口即溶！入面仲加咗冬菇、雞粒同蝦，全部都大大粒，蝦仲好爽口，味道鮮甜。長阪燒丼三重奏 ($158)上枱嗰陣，不禁“嘩”咗聲，刺身好澎湃，鋪滿成碗飯，賣相好吸引！有三小碗共6款刺身，包括三文魚、油甘魚、帶子、海膽、三文魚籽同香蔥吞拿魚蓉，好啱我呢啲心大心細同有選擇困難症嘅人，而且價錢仲好抵！刺身質素新鮮，片片厚切肥美，帶嚟震撼視覺效果！三文魚籽大大粒又飽滿，每粒都顏色鮮艷，晶瑩剔透，魚油甘香同鮮味；海膽肥厚有光澤，質感細膩柔軟，味道甘甜。香蔥吞拿魚蓉口感綿滑細緻，加咗香蔥令味道更加甘香！