醉胡爐 (已搬遷) 新店位置

今日同朋友仔喺尖沙咀聚舊，見到呢間醉胡爐好似幾特別，就諗住一齊入去嚐鮮。店舖裝修古色古香，地方大亦唔會好似普通酒家咁逼埋一齊坐，有私人空間。黎到侍應已經好好服務，就連加飲品同調較火鍋溫度都主動幫手。坐底後我地點左冬瓜鮮雞花膠湯底，價錢比起其他湯底貴啲啲，但絕對物超所值！一落口啖啖雞味湧至，一飲就知足料。加上冬瓜會索埋湯底既味，簡直一流。 之後嗌左響鈴同雲吞，響鈴分為兩種：自家制炸響鈴同埋紫菜炸響鈴。今次我地試咗自家制炸響鈴，自家制的確係脆啲，同平時一般邊爐唔同，浸落湯底三秒就食得。而手工雲吞就嗌左半份，有4粒，好適合2-3位朋友仔打邊爐嘅份量，雲吞皮薄薄地，入面嘅蝦非常新鮮，好有鮮蝦味，絕對同平時係超市買既雲吞與眾不同。最後仲上左個甜品，係聞名已久既水信玄子！味道主要靠黃豆粉同黑糖提升，但唔睇得都食得，大家可以依照大家既口味選擇調味料份量。