火焰山重慶火鍋 (已結業)

之前睇食評都知道將軍澳有間食川味火鍋及串燒嘅店舖叫【火焰山重慶火鍋】幾好，今日終於有機會去試吓。火鍋底我哋叫咗花膠雞煲，配料叫咗鯇魚腩、出前一丁、枝竹、同埋一個叫三國演義嘅菜式，係由墨魚同墨魚滑合成嘅材料。湯底就真係好滋補，而且隻雞又滑又有雞味，鍋內裏嘅花膠大塊又多，絕對係滋補養顏嘅恩物。火鍋配料都好新鮮，魚腩就夠爽脆，三國演義就夠特別同埋好有鮮味。 店員推介我哋要試佢哋的串燒，所以亦點咗鹽烤牛舌、蒙古羊肉串及巴蜀燒新鮮豆腐。牛舌同羊肉串調味啱啱好，好有蒙古嘅特色風味，最緊要肉質夠柔嫩。豆腐就燒到外脆內軟，加埋蒜蓉、孜然香味，絕對夠惹味值得推介。