胡爐 (已結業)

椰子雞鍋，鄉下仔第一次見，用咗新鮮椰青加上燉雞湯，同埋半隻新鮮雞。侍應會首先 煮熱啲雞，再加上少少燒酒加火，就有火焰嘅效果，睇落效果不錯，最後加上椰青水同埋雞湯煮熟佢。做完椰子雞鍋嘅烹調，侍應千叮要試試雞湯嘅味道之後再打邊爐，果然雞湯嘅味好濃、好好味，我哋各人都飲到兩碗以上。調味料都值得一提係因為沙爹醬同埋麻辣醬 味道都好濃郁、好味，加上火鍋料味道好配。其他火煱料未來，先食個冰鎮鮑魚刺身，冰凍鮮甜，好好味。牛肉雜錦盤，一碟裏面有幾款唔同類型嘅牛，呢個都係好少有嘅，分別有牛肉粒、牛展、A5和牛， 每一款嘅質素都唔錯。花膠一碟大約有6-7舊，每一舊都有2隻手指咁大，都幾抵食。海鮮叫咗聖子同埋桶蠔。聖子都新鮮同埋洗得乾淨，唔需要淥得好耐，大約兩至三分鐘就可以。桶蠔大約四至五隻味道鮮甜。蔬菜有一個蔬菜籃再加萵筍，菜籃同萵筍睇落個様都好新鮮。炸魚皮最初都冇嗌，但係見到隔離左右都有嗌，所以就後加多一碟。果然冇錯，呢度嘅炸魚皮係一片片，炸得好鬆化、面再加咗啲 淮鹽，好好味呀，可以即食、又可以淥一淥先食，正。一揸竹蔗茅根水，真材實料少少甜味，道唔錯。