成都小巷 (已結業)

今日中午突然想食酸辣米線，諗起附近有一間叫做「成都小巷」嘅米線鋪，於是就揀佢了。店內環境一般，我地兩個人入到去先知要卡位搭枱，不過繁忙時間都無計，於是照搭，好彩個店員都好識做咁喺中間加返塊隔板，咁就大家都安心啦~點菜方式係好似車仔麵店咁寫紙仔，米線湯底種類有好多，有麻辣、酸辣、清湯、蟲草花雞湯米線等等，所以就算你唔係食辣嘅人都可以入嚟試下佢唔辣嘅湯底！筆者嗌左雲南酸辣小鍋米線，配鮮冬菇同埋豬軟骨，一上菜果下被佢嘅份量嚇親！因為真係好大碗，雖然餸嘅份量唔算多，但勝在米線份量夠多，所以一定夠食！而且湯底好好味，酸辣度適中，唔會出現酸遮左辣/辣遮左酸嘅情況，呢樣野係好難能可貴架~(個人認為呢間餐廳比起啲大型連鎖米線鋪更加好味，所以米線呢家野，小店唔一定比大鋪差架~)價錢方面，兩個餸嘅小鍋米線加一杯凍華田，盛惠$49，價錢嚟講算係好良心的了，呢個價錢你想喺今時今日嘅香港地中午食到飽而又味道唔錯嘅食物，唔係咁容易搵到架咋，所以真心推薦「成都小巷」！