公和荳品廠

營業中

休息中

住係呢區十年八年，經常光襯呢間鋪頭。以前係父輩經營，除咗食到各式豆腐出品，煎豆卜，仲充滿濃濃嘅人情味。近年由太子女接手運作，全店裝修，又增加新款產品，管理上是一大進步。但，人情味去咗邊？之前已試過光襯時係太子女企檔，全程黑口黑面，對客人呼呼喝喝。坦白講，我光襯果十蚊八蚊，亦唔會要求你提供五星級嘅服務，但基本禮貌欠奉，黑面，態度奇差，我亦唔想使錢買難受！之後光襯，都係見到其他收銀姐姐企檔先光襯，一路相安無事。直至今早，又係太子女企檔，趕時間嘅關係唯有照行入去光襯，一朝早客人唔多，計埋我仲有两個客人買早餐，全程太子女黑面，無出過一句聲，全程要等客人自動報上要買咩食物，要咩醬，自動擺低錢，全程感覺係欠佢十萬八萬，臨走最好同佢講聲多謝老細。實在係不吐不快，呢間鋪之前上過蘋果新聞，介紹太子女讀完Master回港接手父業。香港哋傳承嘅除咗食物，更需要傳承嘅係人情味。