再臨閣

營業中

休息中

每次食buffet嘅重點一定係海鮮同魚生，波士頓龍蝦同蟹腳首先滿足咗我嘅要求，龍蝦彈牙清甜，部份仲有橙膏好正，蟹腳正常發揮，蟹鉗好甜。 值得一讚海鮮refill得好快，完全唔洗爭，仲有比較少見嘅琵琶蝦，食得好滿足。魚生有啲驚喜，三文魚、八爪魚、希靈魚同𩶘魚算係常見款，切得好靚仔夠大塊，重點係三文魚夠晒肥美，比平時日本餐廳食到嘅有過之而無不及。鐵板區幾有心，連牛肋骨都會幫你再煎一煎香。 大推虎蝦，order完師傅會即煎，非常新鮮大隻，開埋邊啖啖肉，encore咗好多次。熟食除咗巴東牛肉夠惹味之外，泰式豬手非常入味軟腍，充滿骨膠原。鮑魚夠彈牙，醬汁都幾香。泰式船麵檔湯底一流，淨係要咗菜底同魚蛋，淥咗一陣已經好入味，朋友食咗成個麵大讚好味。榴槤pancake榴槤蓉俾得好慷慨，pancake皮煙靭軟糯。 可以自己加料，不過我覺得本身榴槤蓉已經好夠臭好夠味，可以唔使搞咁多嘢包埋就咁食。