Bistro on the Mile

營業中

休息中

大班人食飯最啱就係食自助餐，就算咸魚青菜各有所愛，大家都會搵到鍾意食嘅嘢食。喺尖沙咀嘅 Holiday Inn 一出係地鐵站附近，仲做緊個海鮮主題嘅【滋味海鮮自助餐七重奏】，由星期一至日，分別係生蠔、三文魚、麵包蟹、帶子、龍蝦、虎蝦、鮑魚。星期二當晚主題係三文魚，一入到餐廳已經見到一個三文魚專區，當然不客氣立即品嚐啦！一口氣攞咗紅菜頭醃三文魚、油封三文魚配蘋果酸忌廉、三文魚他他、忌廉芝士煙三文魚墨西哥卷等等精選，當中油封三文魚配蘋果酸忌廉最為出色！原條三文魚係面前，任你「魚肉」又得，方便啲拎切開咗嘅又得，油脂重嘅三文魚配上清甜嘅蘋果酸忌廉就正正中和咗油膩感覺，恰到好處！跟住就食我主打嘅海鮮冷盤！即開生蠔每次限取三隻，不過都冇阻熱情食足一打！海水味濃，口感亦好。仲有蟹腳、青口、龍蝦仔等等任拎，蟹肉特別鮮甜！刺身種類都係普通嘅三文魚、八爪魚、甜蝦。熱食方面，都係主打幾樣。即切燒西冷，生熟度啱啱好，牛味好濃！蒜蓉粉絲蒸扇貝一啲都唔孤寒，扇貝幾大隻，加埋蒜蓉、蔥花不得了。仲有花膠圓肉燉老雞湯，估唔到咁足料，每盅都有大大舊花膠，即刻滋潤晒～轉戰甜品時已經唔係太食得落了，但總覺得食完甜品先夠圓滿。