嘉禧餐廳 (已結業)

女朋友近排返工成日周圍去，今日就係中環。難得我都係附近，互相接大家放工之餘，仲可以去浪漫一下，食返個燭光晚餐。由上環行干諾道中去IFC，無意間係天橋附近發現左呢間法國餐廳。即使係夜晚，湖水藍色嘅門面裝修都好搶眼，似外國咖啡店又富有情調。我地就係咁被吸引左入去。店舖不大，大概十數個位置，幽暗環境更添浪漫。細問之下原來餐廳係法國有自己酒莊，酒品有保證，而且食物亦都係採用新鮮有機農作物。點左黑松露野菌湯，蘑菇味香濃，湯品細滑。主菜要左巴隆醋佐法式鴨脾。Duck Confit ，中文譯做油封鴨腿，係法國傳統菜式，係好耐以前未有雪櫃嘅年代，用黎保存食物嘅方式之一。鴨脾皮十分香脆，伴以大量新鮮沙律菜，再配上酸酸甜甜嘅黑醋，一啲都唔會油膩。醃鴨肉仍然保持嫩滑，鹹度適中。