影片
更多
2021-03-14
600 瀏覽
銅鑼灣535嘅地庫有好多餐廳，我幾乎全部食勻哂，呢日就食埋新開嘅「段純貞牛肉麵」，嚟個大滿貫。由於買咗飛夜晚睇戲🎬，所以就早啲食晚飯，估唔到嘅係同我哋五點鐘一樣咁早食Dinner嘅人都有唔少，哈哈。過江龍店令我有所期望，但同時亦怕失望，因為真係中過唔少次伏🙈。香港有唔少台灣食店，不過有賣牛肉麵嘅就唔算多，所以我更一直都搵唔到間好食嘅...，直至今日終於有開心大發現。未食之前我喺度諗，即使呢餐唔好食，但我都唔會好嬲，因為佢定價唔算貴😃。每人一碗麵同飲品，再加份小食一齊分享，人均消費都係百頭左右，喺銅鑼灣地段算係咁啦。原味牛肉麵($84)，🐮牛肉麵係招牌菜，每枱客人都必定會點。不過呢度唔止得一款，湯底同餸料均有多個選項，故演化成十二個唔同嘅組合。我哋就揀咗最原汁原味嘅原味牛肉麵，咁先至試到最正宗味道。以新鮮牛油同多種食材及中藥熬煮出嘅牛骨湯底好飲喎🤤，我成碗飲哂！湯頭唔會死鹹同重味精，而且仲一啲都唔油，爽，食得出係經過用心調配。牛肉呈條狀，好大件，大約有四件，肉質有彈性，食落好有滿足感。另外，仲搭配咗兩條小棠菜添。湯麵嘅麵條配咗手工麵🍜，店員介紹呢款即係有啲似刀削麵，厚薄不一係佢嘅特色。佢
銅鑼灣535嘅地庫有好多餐廳，我幾乎全部食勻哂，呢日就食埋新開嘅「段純貞牛肉麵」，嚟個大滿貫。由於買咗飛夜晚睇戲🎬，所以就早啲食晚飯，估唔到嘅係同我哋五點鐘一樣咁早食Dinner嘅人都有唔少，哈哈。
過江龍店令我有所期望，但同時亦怕失望，因為真係中過唔少次伏🙈。香港有唔少台灣食店，不過有賣牛肉麵嘅就唔算多，所以我更一直都搵唔到間好食嘅...，直至今日終於有開心大發現。
未食之前我喺度諗，即使呢餐唔好食，但我都唔會好嬲，因為佢定價唔算貴😃。每人一碗麵同飲品，再加份小食一齊分享，人均消費都係百頭左右，喺銅鑼灣地段算係咁啦。
原味牛肉麵
$84
15 瀏覽
0 讚好
0 留言
原味牛肉麵($84)，🐮牛肉麵係招牌菜，每枱客人都必定會點。不過呢度唔止得一款，湯底同餸料均有多個選項，故演化成十二個唔同嘅組合。我哋就揀咗最原汁原味嘅原味牛肉麵，咁先至試到最正宗味道。以新鮮牛油同多種食材及中藥熬煮出嘅牛骨湯底好飲喎🤤，我成碗飲哂！湯頭唔會死鹹同重味精，而且仲一啲都唔油，爽，食得出係經過用心調配。牛肉呈條狀，好大件，大約有四件，肉質有彈性，食落好有滿足感。另外，仲搭配咗兩條小棠菜添。
湯麵嘅麵條配咗手工麵🍜，店員介紹呢款即係有啲似刀削麵，厚薄不一係佢嘅特色。佢比我想像中更粗身，粗到好似涼皮咁，口感一流又夠滑。麵條唔多，但一啖係啜唔哂一條㗎，好玩又好食，而且亦好飽肚。
青花椒香手撕雞乾拌麵
$76
20 瀏覽
0 讚好
0 留言
青花椒香手撕雞乾拌麵($76)，牛肉麵係好食，不過呢個拌麵更令我喜出望外，因為嗰浸青花椒香味真係正到不得了😋。佢完美演繹出何謂「麻而不辣」，啱哂啲鍾意「麻」但又唔食得辣嘅人(即係我)。好味道、好味道、好味道，重要嘅嘢要講三次！醬汁集中喺底，要撈匀先好食啊。拌麵嘅配料有🐔雞絲、花生同芽菜等，份量唔孤寒，每啖都食到。佢隻溏心蛋亦係意想唔到嘅味道🥚，因為蛋白醋味強、微微酸，幾得意。
拌麵嘅麵條就配咗細麵，呢款嘅造型同麵質都同手工麵大不同，佢嘅密度高好多，掛汁就最適合不過🈴️。但唔知係咪放耐咗嘅關係(因為我哋先食湯麵)，細麵有少少糊，但未到爛，撈返汁就OK，整體無影響。
麵食配有醃菜小食，份量唔多，但啱啱好。味道亦好到位，鹹酸度拿捏得恰到好處，好開胃😛。
紅油抄手
$48
18 瀏覽
0 讚好
0 留言
紅油抄手($48)，一上枱嘅時候我唔知呢碟係乜嚟，因為只係見到一大堆芽菜。撥開芽菜先見到抄手，🥟抄手有五隻，數量偏少，但勝在隻隻都皮薄餡靚，似鮮蝦雲吞多過鮮肉餃子。醬汁應該係用上豆瓣醬，因為有唔少碎粒，🌶辣度亦幾勁下。呢道菜同我平日食開嘅都幾唔同，好有特色。
飲品方面，我哋要咗凍香芋珍珠奶茶($28)同愛玉蜂蜜西檸特飲($30)，兩杯味道其實都唔錯😗，但比起食物水準就無咁出眾。前者好香芋頭味，珍珠係用上細粒嗰種，有嚼勁。後者我略嫌偏甜，而且比我感覺有啲似茶記嘅凍檸蜜🍋。
總括嚟講，段純貞代表住獨特嘅台灣好滋味🇹🇼，佢嘅出品好食得來仲要富有自家風味。碗底寫住「獨門二十三香 以香傳鄉」，餐廳真係切實做到了。食物以外嘅部份亦令人滿意，包括環境舒適、店員服務態度友善以及定價合理，推介🌟！
張貼
