榴槤樂園 (金巴利道) (已結業)

之前上網見到尖沙咀有間以榴槤做主題嘅餐廳，作為榴槤忠實粉絲嘅我，就趁機去試下。喺香港好似比較少榴槤做主題嘅餐廳，一入到去就已經聞到榴槤味🤤🤤好香。坐底冇幾耐，老闆同老闆娘都各自向我同朋友介紹佢地嘅招牌菜，榴槤芝士餅同期間限定嘅榴槤雪球。咁我同朋友兩個人就叫左一個榴槤芝士餅，榴槤雪球同一杯榴槤珍珠奶茶呢個榴槤芝士凍餅都幾香榴槤味，芝士味較重。可能係因為凍餅嘅關係，食落好似食緊榴槤冰條感，口感好特別。至於呢個榴槤雪球，榴槤味好重。因為有一舊榴槤喺入面！加埋啲cream同係凍食嘅關係，真係好似食緊榴槤雪糕咁！好正！店員仲推介我地用手食，好似會滋味啲！😂😂最後就係呢杯榴槤珍珠奶茶。先講左佢將榴槤打成好似奶昔咁，口感好滑！更值得一提係佢地啲珍珠煮得好有口感，好好咬而且好大杯，好彩兩個人share ！整體黎講，餐廳不論係老闆定店員都好友善！而且老闆講佢地有自家果園，所以有物質保證！