榮哥廚房私房菜

營業中

休息中

經朋友介紹，早幾日預訂咗榮哥廚房私房菜，佢哋精心準備咗個二人餐畀我哋。 頭盤有四個，分別係有機沙律菜拌芝麻醬，涼拌黑木耳，紫薯配鮮淮山，茶燻流心蛋拌黑魚子醬厚切茄子。 首先係有機沙律菜拌芝麻醬。啲沙律菜好新鮮，番茄都好鮮甜同多汁。跟住係涼拌黑木耳，黑木耳好爽脆。 仲有紫薯配鮮淮山，淮山口感好爽同實，唔會有粉嘅感覺，紫薯都好甜。茶燻流心蛋拌黑魚子醬厚切茄子，流心蛋好有茶味，同隻蛋好滑。 跟住兩個湯都送上，分別係完盅燉哈密瓜螺頭黑毛豚肉湯，原盅燉川貝陳皮海底椰鱷魚肉湯，兩個湯啲料都好足，有肉有配料。蜜瓜豚肉湯，比較鮮甜，鱷魚肉湯，肉味比較濃。 蝦球水芙蓉，有兩份，賣相好精緻，有大蝦喺中間，有燉蛋喺下面，中間有黃色嘅湯。 另外，蒜香芝士焗老外蠔王亦都送上，隻蠔好大隻，下面有薯蓉托住，隻蠔表面充滿芝士同蒜香，而且隻蠔好大好新鮮同甜。 跟住係遠年新會陳皮骨，上碟個樣同樣好精緻，入邊有舊厚嘅排骨，味道好新鮮同特別。 魚湯浸碧綠溫室菜苗，魚湯好鮮甜，溫室菜苗好清新。 最後係荷香蒜蓉海斑片原籠蒸鴛鴦飯，海斑片好鮮甜，而且下面係紅米飯，啲飯都吸咗海斑嘅鮮甜，呢個配搭唔錯。