蔡瀾越南粉 (已結業)

見呢間鋪頭每日食晏嘅時候都排起碼3-40人，我就搵一日傍晚六點鐘趁佢冇人去食一碗試吓佢咩料。我覺得佢樓面嘅安排好有問題，帶位嘅人亦都好唔醒目，好混亂好容易俾人打尖。樓面冷氣唔夠凍，行到入邊有濕粒粒嘅感覺。我比安排坐高枱，我覺得張凳同個枱面嘅距離有啲遠對食面來講有少少辛苦我自己都唔算矮我都唔知矮小小嘅人點算。好啦咁講返食物，我好明確咁樣要做一碗走芫茜嘅牛肉河，嚟到都照係有啦咁都算啦自己飛走但佢啲味都仲喺度。第一啖飲落去個牛肉湯係好清不過真係冇特別，絕對唔係飲過返尋味。河粉都算滑不過唔係我食過最好食嘅。牛肉就真係好普通，不值一提。我肯定香港有10間鋪頭都好食過佢。完全唔明白點解有人要排隊。我亦都叫左一杯凍嘅越南咖啡，最大嘅問題就係佢一啲都唔濃。如果要去中環食越南野，都係行多兩步去同一條街中間食啦。如果都係要排隊，我就一定唔會排佢囉！