Aroma Truffle (已結業)

自從試過朋友喺新加坡買返嚟嘅鹹蛋黃同黑松露薯片之後，我就一直念念不忘，後來鹹蛋黃薯片進軍香港，總算可以止一止癢，奈何黑松露薯片一直未見蹤影，最近發現Aroma Truffle終於進軍香港，作為小粉絲嘅我當然要會一會佢。顏色鮮明嘅紙袋上面印住the world ’s strongest truffle chips，相當有自信，門店暫時有三種味道，分別係原味、蜜糖芥末味同芝士味，我揀咗原味同蜜糖芥末味。記憶中第一次食就係食原味嘅黑松露薯片，一打開包裝，黑松露迷人嘅香氣令人不自覺合起雙眼深呼吸。薯片切成大波浪形，令黑松露嘅味道更突出，唔止聞落去好香，食落去黑松露嘅味道同樣明顯，仲加入香草碎令味道層次更豐富，口感亦非常香脆。除咗原味之外我仲買埋未試過嘅蜜糖芥末味，非常有驚喜。薯片嘅松露味道同樣香濃，但蜜糖嘅味道更加突出，所以比較起上嚟黑松露嘅味道就比原味弱少少，但蜜糖味好清新，一啲都唔人工，加上薄荷葉碎點綴，食極都唔膩。薯片每包100g，份量都唔少，但面對誘人嘅松露香，試問又點忍得口，一次一包實在係濕濕碎，下次經過一定要買埋芝士味！