正點心 (已結業)

今日爸爸發板帶我去正點心飲早茶，較為傳統嘅爸爸，一般都只係我去傳統嘅大酒樓飲茶，最近佢聽佢朋友介紹話呢間正點心值得一試，竟然主動邀請我同佢一齊去試菜。我發現佢嘅點心真係同一般大酒樓嘅點心有啲唔同，我哋點左蘆筍鮑魚鳳眼餃，每一粒鳳眼餃上面都有一細粒鮑魚仔，飲個早茶都有鮑魚食，感覺超現實，鮑魚仔嘅口感亦唔會超硬，每粒口感恰到好處，咬得開亦有口勁。另外，我哋點左紙醉金迷流沙包，淨係個賣相已經好似喺包上面鋪上金箔咁，非常漂亮，咬開個包奶黃流沙慢慢流出，口感獨特。我同爸爸講，下次再食一定要嗌多幾個點心，款款有驚喜。