影片
更多
2010-11-24
22 瀏覽
是日係銅鑼灣shopping完，之前一直大叫想食煲仔飯，就提議搭叮叮落西環黎食啦。夜晚六點幾搭叮叮，無咩人，吹住晚風好舒服~~~ 見差唔多到正街就落車，行上皇后大道西就係啦。開頭仲驚好多人要等位好耐，始終天氣開始凍啦嘛，黎到見到店對面有 3 - 4 個人貌似排緊隊，我就跟住企係佢地後面... 雖然都唔知係咪正式既隊黎的，但好彩地阿姐好快就有張檯俾我地坐低啦，真好~ 因為之後黎既客人除非有訂位，如果唔係都聽到叫佢地有排等。雖然咁快有位坐係好好，不過等個兩煲煲仔飯既時間先漫長，等呀等等呀等，又要吹風喎，等左大概成 40 - 50 mins先有得食，不過黎到見到佢熱辣辣噴哂煙既樣真係覺得好滿足呀。我地分別叫左白鱔同埋臘味田雞煲仔飯，後者先黎到，前者隔左十分鐘到都跟住上啦。臘味有臘腸+膶腸+腊肉，再加上幾多肉食既田雞脾，成個煲仔飯好惹味。臘味夠哂肥，舊腊肉真係成層脂肪但咬落超甘香，好味~ 加埋D飯索哂D油份，田雞都幾鮮味，所以當然正啦~不過我覺得白鱔煲仔飯更加好食，佢本身用豉汁蒸已經好香，加埋條白鱔夠肥美同鮮味，索咩D豉汁食落真係好滿足~ 佢仲加左果皮辣椒去蒸，所以一路食既時候都食到果皮香同埋
是日係銅鑼灣shopping完，之前一直大叫想食煲仔飯，就提議搭叮叮落西環黎食啦。夜晚六點幾搭叮叮，無咩人，吹住晚風好舒服~~~ 見差唔多到正街就落車，行上皇后大道西就係啦。
開頭仲驚好多人要等位好耐，始終天氣開始凍啦嘛，黎到見到店對面有 3 - 4 個人貌似排緊隊，我就跟住企係佢地後面... 雖然都唔知係咪正式既隊黎的，但好彩地阿姐好快就有張檯俾我地坐低啦，真好~ 因為之後黎既客人除非有訂位，如果唔係都聽到叫佢地有排等。
雖然咁快有位坐係好好，不過等個兩煲煲仔飯既時間先漫長，等呀等等呀等，又要吹風喎，等左大概成 40 - 50 mins先有得食，不過黎到見到佢熱辣辣噴哂煙既樣真係覺得好滿足呀。
我地分別叫左白鱔同埋臘味田雞煲仔飯，後者先黎到，前者隔左十分鐘到都跟住上啦。臘味有臘腸+膶腸+腊肉，再加上幾多肉食既田雞脾，成個煲仔飯好惹味。臘味夠哂肥，舊腊肉真係成層脂肪但咬落超甘香，好味~ 加埋D飯索哂D油份，田雞都幾鮮味，所以當然正啦~
不過我覺得白鱔煲仔飯更加好食，佢本身用豉汁蒸已經好香，加埋條白鱔夠肥美同鮮味，索咩D豉汁食落真係好滿足~ 佢仲加左果皮辣椒去蒸，所以一路食既時候都食到果皮香同埋少少辣，冬天食真係啱哂! 我鍾意呢個多D呀~~~
當然唔可以忘記D飯焦啦，咬落脆卜卜，焦味又香，食完開心哂。
雖然吹風吹左長時間，但食完煲仔飯即刻成個人都暖笠笠，好幸福呀。=))))
張貼
