烏蠅館 (已搬遷) 新店位置

又到放工後要匆匆一人吃個晚飯然後去上堂嘅日子，但係匆忙得來總不能虧待自己！今次就搵到呢間近嚟人氣幾高嘅烏蠅館，聽落名字已夠趣怪，仲要係食聞所未聞嘅冒菜，最鍾意試新野食嘅我當然要一試啦。餐廳係樓上鋪，位置不太顯眼，但係估唔到晚上6點半左右餐廳幾乎已經坐滿。一人餐基本上一係就六餸麵一係就八餸麵，極肚餓嘅我當然就要了八餸，點菜紙嘅形式就好似食車仔麵咁揀餸，望住三四十款唔同嘅選擇，選擇困難嘅我掙扎左起碼10分鐘先揀好。最後我叫了娃娃菜、通菜、豬潤、貢丸、肥牛片、豆卜、魚腐及鵪鶉蛋，湯底揀了麻辣小辣，再選了火鍋寬粉，蒜蓉芫荽葱全部都要。一上菜見到綠色鋪滿成碗麵，啱晒芫荽控嘅我!翻開滿滿嘅芫荽終於見到我叫嘅餸，八樣餸嘅份量果然唔係講笑，而且麻辣湯底味道調得剛好，尤其係牛肉同豬潤吸收晒湯嘅精華份外惹味。第一次食寬粉，口感超級煙靭，少啲牙力都食唔掂！餐飲點了熱檸茶，檸茶用原片茶片沖成，茶味香濃。