天天海南雞飯 (Fashion Walk)

營業中

休息中

天天海南雞飯係一家喺新加坡有米芝蓮推介嘅餐廳，之前去新加坡水門市場都食過，唔知嚟到香港嘅味道係點！今日收工同朋友去咗呢一間係銅鑼灣名店坊嘅天天海南雞飯，地點都非常方便，距離銅鑼灣地鐵站E出口好近，去到好好彩地坐到最後一張枱，依一間餐廳嘅晚市都好多人，我哋就會被安排咗喺近門口嘅一個位置，餐廳亦都戶外嘅位置，方便需要吸煙嘅食客。我哋就叫咗一個海南雞（大），一個油飯，一個老鼠粉同埋一個炒西蘭花！首先必須推介就係佢嘅海南雞，呢道菜係天天海南雞飯做得非常好。雞肉非常鮮嫩，食得出本身隻雞嘅新鮮，而且加了店舖本身特殊既調味，令雞肉有一種特別風味，亦都可以配搭甜豉油薑蓉同埋辣醬，令到雞肉嘅味道更上一層樓油飯亦做得好好，有一種微微芳香，再搭配上雞肉同醬汁，實在非常配搭。除左海南雞飯之外，其實天天海南雞飯既其他菜式都非常好食。老鼠粉亦都係新加坡傳統嘅小食，老鼠粉配以辣椒，雞蛋，脆魚仔，花生，肉碎同埋辣椒撈埋一齊食，有一種非常特別嘅口感，口感非常豐富。佢嘅調味亦都唔會太鹹，味道適中！蟹肉炒西蘭花亦都係值得推介，蟹肉嘅鮮味同埋西蘭花嘅清爽口感互相融合，廚師喺個面度再加以炒蛋白同埋蟹子，令到成個菜式嘅味道昇華。