潮洲滷 (已結業)

講到斬料，斬大舊叉燒係常態，但今日嚟到灣仔街市，見到掛哂一隻隻滷水鵝喺度嘅潮州滷，又見有唔少街坊行過幫襯，好似好正咁，唔斬燒味斬滷味喇不如！呢度除咗滷水鵝，亦都有滷水鴨賣，想經濟少少都得。當然仲有翼、掌、腸、腎、豬大腸、豬頭肉、豬耳……就連雞肶都有，真係講得出嘅滷味都搵到咁滯，選擇困難咗一輪之後，都係要斤滷水鵝啦！都有成四分一隻鵝架，大大份，上下裝任揀。今次揀咗下裝，因為鍾意啖啖肉嘅肶位！佢哋仲好好咁一包滷汁，一包醋咁包得好骨緻，店長仲勁貼心地提醒食嗰時先淋啲滷水汁落去，真係想立即跑返屋企開餐。滷水好唔好食，個汁好重要。呢度嘅滷汁好香，唔會一味死鹹，食落仲有少少甘甜，讚！鵝肉滷得啱啱好，入哂味，軟滑得嚟又唔韌。最緊要係唔會太肥，最怕嗰啲塊皮同肥膏厚過舊肉嘅滷水鵝，好彩呢個皮同肉嘅比例啱啱好，食埋塊皮全無罪疚感之餘，亦感受到滿口鵝肉香。滷水鵝仲要咗豆腐底！吸收哂滷汁同鵝油嘅精華！真係食到舐舐脷！正！又搵到個買滷水鵝斬料嘅好地方喇！