誠拉麵 (已結業)

太古Aeon自大翻生以嚟，food court檔次高咗，我就好少再幫襯喇。今日堂食呢間誠拉麵可以話係我嘅新．第一次。明太子手羽餡料爆滿，明太子吸咗雞油，更加香辣。煎餃子皮都幾黏，餡都足料，不過有啲位穿咗皮，肉汁唔多，要扣少少分。我點咗嘅係味噌拉麵。豬骨湯底每日新鮮熬製，用上日本味噌，湯底唔算太濃，但亦因為冇傳統拉麵咁鹹而食得舒服，食得出味噌香。溏心蛋冇得挑剔，味道同生熟度都恰到好處。叉燒係薄切款，油脂分佈均勻，咬落去脂肪香而不膩。拉麵設計方面都幾有心思，每款除咗湯底之外會加多至少一樣特色。呢碗嚟講就用咗比較香同彈牙嘅蛋太麵。黑蒜拉麵而家似乎係拉麵店必備。呢度嘅湯唔算濃，但黑蒜味都幾出。麵條唔洗煮得太腍都掛到湯。而家推緊呢個套餐，加少少錢有兩款小食。雖然環境唔算太好，但餐廳喺每個吧枱位都加咗鈎畀人掛袋，算係幾貼心。