名廚 (紅磡邨) (已結業)

加完班喺屋企附近搵食，見到呢間餐廳九點半已經開始宵夜時段，而且仲有我最鍾意嘅梅菜扣肉飯，梗係即刻衝入去啦。點完單，個飯差唔多即刻到，當然我預咗，亦都唔抗拒個餐係一早整定，但係點計都實在太快喇。天口㷫，即時啜兩啖一早叫咗少冰嘅檸檬茶之後先至望下杯飲品，以人嘅身高嚟比喻既話，冰既份量已經去到我嘅腰。三塊薄切嘅檸檬完全符合一般嘅快餐廳標準，檸檬出乎意料地夠味，唔錯。碟飯上枱時竟然從見到布甸放上枱時晃動嘅感覺，可能係因為幾塊充滿油脂嘅肉疊埋一齊，總之視覺效果滿分。萬料唔到梅菜扣肉飯身上見到布甸嘅影子。肉唔算鞋，但係味道好寡，肥膏嗰部分係滿意嘅。梅菜依個大配角分量太少而且唔夠味，汁亦都唔夠，飯有啲乾，可能焗耐咗。但係，每啖飯配少少汁，少少梅菜，一小塊肥膏，真係不得了呀。呢個時候，所有不滿都忘記晒啦。最後埋單嗰陣，收銀阿姐唔記得咗收宵夜嘅價錢，好彩我即時發現， 記住睇單呀。