老厝邊 (已結業)

大角咀一向美食甚多，許多小店臥虎藏龍，這間老厝邊主打古早台灣菜，價錢親民，但食物極有水準。自從搬去奧運站後，我已經光顧過幾次！呢晚突然想食台灣菜，第一時間想到老厝邊，點咗幾款之前未試過嘅菜式，水準依然，完全冇令人失望！超濃芋泥蛋餅($35)蛋餅餅皮煎得脆而不油，包住飽滿嘅芝士同芋泥餡料，輕輕一拉已經有芝士拉絲嘅效果，非常吸引！一啖咬落去先發現原來除咗芋泥同芝士之外，仲有肉鬆，甜甜鹹鹹，我仲鍾意蘸一蘸辣醬，味道更有層次。眷村紅燒牛三寶麵($78)湯底做得出色，味道鮮甜，有濃郁牛肉香味，出街食飯我好少會飲湯底，但呢個明顯不添味精，而且毫不油膩，飲完無口渴感覺！麵條係幼麵，好鍾意佢嘅質感，煙煙韌韌又掛湯。牛腱肉質細緻軟腍，牛筋嫩滑之餘同時保持挺身有筋性，牛肚亦軟嫩入味。鹵原隻雞腿便當($60)上桌時完全呆了，實在無諗過$60會咁大份，實在太佛心啦！雞髀大大隻，肉質嫩滑，鹵得入味。配菜有肉燥飯，鹵水豆腐，鹵水蛋同大量茄子蔬菜，非常豐富。肉燥飯份量十足，飯粒吸收肉燥油香，味道香口。來過咁多次都無試過飲品，下次一於留少少肚試下先！