蟹慶 (已結業)

炎熱天氣下天最好活動就係行街shopping，銅鑼灣電車路旁《蟹慶》食過唔錯，今日又嚟食。前菜~柚子蟹肉蟹子沙律+新鮮粟米+螺肉，柚子沙律清甜有益，特別醒胃，新鮮粟米爽脆香甜，呢個前菜要讚一讚。刺身四點~赤蝦+元貝+油甘魚+三文魚，元貝特別大隻，三文魚夠鮮甜。蒸毛蟹~配水雲蟹醋，廚師已經好貼心把每部分剪開，方便進食，揸住毛嘅地方，免得俾刺拮傷，蟹肉鮮甜，蟹膏香滑勁正！鵝肝茶碗蒸~ 鵝肝配蒸蛋真係一絕，上面仲有蟹子，材料豐富，十分香滑。松葉蟹腳雜錦天婦羅~有蝦、有蟹腳、仲有南瓜同秋葵，件件新鮮炸起，入口香脆，活少少抹茶鹽都唔錯。明太子蘆筍~呢個炒得特別香口，粒粒明太子鋪滿條保露筍。名古屋汁燒穀飼牛扒~上鎖匙已經聞到牛肉香噴噴，薄切牛扒容易入口。鯛魚白湯~魚湯味道夠香濃，食到呢個位已經飽飽哋，飲埋湯進入尾聲。蟹肉稻庭烏冬~呢個冷烏冬真係好出色，蟹肉、蟹膏、三文魚子，烏冬非常軟滑。甘物(甜品)~抹茶布甸配紅豆，仲有黃豆蕨餅。