影片
更多
2021-07-29
3595 瀏覽
秋田鐵板燒喺我嘅To Go List 已經好耐，適逢朋友想食鐵板燒，今日就將呢個項目get it done 😎。佢喺尖沙咀同灣仔都有分店，方便起見我哋就揀咗尖沙咀。店舖坐落喺比較寧靜嘅天文臺圍，行完段斜路仔上去，胃口都好啲🤣。原來佢呢度一幢幾層都係秋田食店，地下係浜燒屋，一樓同三樓係鐵板燒+刺身， 二樓係蟹宴鍋物。想食唔同嘅日本料理，似乎呢度都可以滿足到😋。搭𨋢上一樓，但部𨋢比較舊，心諗食店環境會唔會好差。入到去一如所料唔係新淨，但幸好佢裝修以黑色為主，配上射燈，環境昏暗得來不失格調，所以未至於太礙眼。鐵板燒來講佢算幾大，有好多張U型枱，每張枱喺不同角落，多人都唔會好嘈，比較有私隱。牆上掛上不同嘅和風畫作及紙簾裝飾，周圍又有形形色色、大小不同嘅清酒酒樽作襯托，隱約有種懷舊嘅日本風情🗾。佢嘅lunch set有四款，包括櫻🌸、楓🍁、菊🌼、桃🍑，價錢由$188-$350不等。一如一般鐵板燒，蒸蛋、沙律、味增湯、炒野菜、炒飯、雪糕或茶都唔少得，我同朋友就揀咗楓🍁+菊🌼，分別係$198同埋$288。首先上嘅係田園沙律🥗，同埋鮮三文魚子蒸原殼蛋🥚。雖然田園沙律都係一般雜菜，但蔬菜爽脆新鮮，醬汁嘅
秋田鐵板燒喺我嘅To Go List 已經好耐，適逢朋友想食鐵板燒，今日就將呢個項目get it done 😎。
佢喺尖沙咀同灣仔都有分店，方便起見我哋就揀咗尖沙咀。店舖坐落喺比較寧靜嘅天文臺圍，行完段斜路仔上去，胃口都好啲🤣。原來佢呢度一幢幾層都係秋田食店，地下係浜燒屋，一樓同三樓係鐵板燒+刺身， 二樓係蟹宴鍋物。想食唔同嘅日本料理，似乎呢度都可以滿足到😋。
搭𨋢上一樓，但部𨋢比較舊，心諗食店環境會唔會好差。入到去一如所料唔係新淨，但幸好佢裝修以黑色為主，配上射燈，環境昏暗得來不失格調，所以未至於太礙眼。鐵板燒來講佢算幾大，有好多張U型枱，每張枱喺不同角落，多人都唔會好嘈，比較有私隱。牆上掛上不同嘅和風畫作及紙簾裝飾，周圍又有形形色色、大小不同嘅清酒酒樽作襯托，隱約有種懷舊嘅日本風情🗾。
佢嘅lunch set有四款，包括櫻🌸、楓🍁、菊🌼、桃🍑，價錢由$188-$350不等。一如一般鐵板燒，蒸蛋、沙律、味增湯、炒野菜、炒飯、雪糕或茶都唔少得，我同朋友就揀咗楓🍁+菊🌼，分別係$198同埋$288。
首先上嘅係田園沙律🥗，同埋鮮三文魚子蒸原殼蛋🥚。雖然田園沙律都係一般雜菜，但蔬菜爽脆新鮮，醬汁嘅酸甜度亦拿捏得好好，唔錯。
蒸蛋唔係一般嘅杯上，而係用原蛋殼盛載烹調。我成日都覺得盛載食物嘅器皿，喺整個用餐過程上有不能小覷嘅作用，佢往往能夠令食物變得更色香味一點，呢個就足以令食客更記得呢間餐廳，同同行拉開距離。喺原隻蛋殼上面食蒸蛋，感覺更新鮮、更原汁原味，配上鮮三文魚子，望落去晶瑩剔透，成件藝術品咁，個蒸蛋即刻upgrade咗。
鮮三文魚子蒸原殼蛋 / 田園沙律
76 瀏覽
0 讚好
0 留言
食完前菜，就嚟到戲肉。首先上嘅係鮮活原隻南非鮑魚，以呢個價錢有咁大隻鮑魚，而且見佢喺鐵板上極其新鮮，性價比非常高。師傅完美地將鮑魚解體，配上些少調味料，就送上我哋面前。一放落口，鮑魚彈牙爽口，有鮮味，完全冇靭嘅感覺，絕對煮得恰到好處👍🏻。
鮮活原隻南非鮑魚
70 瀏覽
0 讚好
0 留言
再嚟香煎法國鵝肝配多士，睇見鵝肝一放上鐵板被煎得滋呢咋啦地作響，空氣裡面慢慢地瀰漫住油香，真係忍唔住會吞口水🤤。大啖咬落去，呢個鵝肝完全冇將貨就價，外面有少少焦香，內裏軟滑入口即溶，嗰種油香真係難以形容。配上烘得脆脆嘅多士，中和當中嘅油膩，呢個餸菜簡直係完美嘅化身😍。
香煎法國鵝肝配多士
70 瀏覽
0 讚好
0 留言
我同朋友另外仲叫咗支清酒，呢個時候嚟到， 正好為味蕾帶來一點衝擊，除去剛才食物嘅油份之餘，亦為我哋下一度菜做好準備😎。
杜藏清酒 / 脆蒜片美國牛小排
62 瀏覽
0 讚好
0 留言
我哋分別叫咗脆蒜片美國牛小排，同埋和牛脆蒜片青葱薄燒卷去share。牛小排唔算大件，放上嘴邊聞到濃郁嘅和牛味，本來十分期待，但咬落去好多都有筋，真係大失所望！幸好緊接住嘅薄牛肉燒嫩滑多汁，配上香蔥同埋脆蒜片，更能夠襯托出和牛嘅香味，卻又去除到箇中油膩，咁樣先至挽回不少分數。
和牛脆蒜片青葱薄燒卷
58 瀏覽
0 讚好
0 留言
之後送上嘅就係漁香味噌湯，炒野菜，以及秋田特色炒飯。各樣都平分春色，尤其炒飯份量不少，男士們都唔使驚唔夠飽。
炒野菜 / 秋田特色炒飯 / 漁香味噌湯
51 瀏覽
0 讚好
0 留言
原本諗住尾聲只有雪糕作結，但唔知點解廚師再送上一個紅豆餅🤩，剛剛好平衡呢一餐油份較重嘅主食，以及帶點辛辣嘅清酒餘醖。最後送上一個綠茶雪糕，有綠茶香味得來又唔會太苦澀，大大的一球，為幾乎完美的一餐畫上句號。呢一餐實在好滿足😚！
綠茶雪糕 / 紅豆餅
52 瀏覽
0 讚好
0 留言
其中一樣要為餐廳平反嘅係服務質素，之前喺OpenRice見到有好幾個食評都話店員服務態度差，但今次我去，幾個不同嘅店員態度都好好，服務妥貼。食完嘅器皿好快收走之餘，如果咁啱在旁，又會幫我哋將廚師準備好嘅食物放落我哋位。就算清酒佢哋曾經漏單，詢問之後都馬上道歉，並且好快就送上一壺。同其他餐廳對比，呢度嘅服務算十分不錯，係廚師哥哥cool少少囉🤣。
總括嚟講呢度嘅食物、服務、價錢都唔錯，性價比無疑係高，唯一欠缺係環境差少少。下次有機會要試埋灣仔分店，地方新淨啲，感覺應該更舒適😙。
張貼
