串Grill 自助燒烤專門店 (廣華街) (已結業)

呢間串Grill自助燒烤專門店真係好食又抵食，之前食過油麻地分店，今日就黎到廣華街呢度再食過。枱上仲有燒烤時間建議，真係夠哂細心。雪櫃裏面嘅飲品都係任飲，我最鍾意佢有豆漿提供。枱上放有唔同嘅調味，而高身嘅樽裝就係燒烤用嘅醬汁，即係好似BBQ嘅蜜糖咁。店員首先會奉上肉類串燒作為頭盤，基本上每款串燒都係咁正，我尤其推介荷蘭豬五花，經過燒烤之後除去多餘油脂，食落就更加甘香，味道甚有驚喜。燒嘢食食腸仔是常識吧，廚師腸同芝士腸都係咁好味，我就特別配返少少蔬菜，翠玉瓜同車厘茄都係我嘅至愛。丸類方面，我就特別推介佢嘅魚片頭同埋魚肉年糕，台灣腸就帶有黑椒味，所以都幾香口。呢個爐真係夠晒方便，每串串燒放喺爐上就會自轉，確保燒得夠均勻，一定唔會燒燶。串燒七彩繽紛，真係好睇又好食。嚟到尾聲就當然係食甜品啦，棉花糖同雞蛋仔都係咁好味，而棉花糖咁樣燒就真係夠晒方便又容易控制，包你粒粒都咁靚！最後每人仲可以有一杯Haagen-Dazs，總共有四款味道選擇，我就揀咗蜜瓜同士多啤梨，為今晚畫上完美句號。