川一料理 (已結業)

同朋友食下午茶食得太飽，夜晚飯都食唔落太多，所以諗住搵啲輕食當晚餐，最後就係太安樓附近搵到呢間主打四川料理外賣店。唔好睇店鋪門口細細，裡面嘅食物選擇好多㗎，有酸菜魚，水煮魚，甚至有飯，麵，薯粉，連涼拌料理都有20幾款，好多選擇。好彩我哋一早諗住輕食，撇除澱粉質，只要係涼拌料理裏諗就可以了。我地第一眼被吸引嘅就係藤椒魚皮，炸魚皮就食得多，涷魚皮都係第一次食。一咬落口，非常爽脆，口感Q彈，加上藤椒嘅麻辣味道，真係好正，一試愛上。冰鎮墨魚仔，size適中，幾爽口，唔錯。肥鵝腸，脂肪略多，但美食總係邪惡的。另外仲可以揀4併，只需$60，啱哂選擇困難嘅我地，我地揀好餸，再揀辣度，就交俾店員為我地調味。味道既香又辣，非常惹味，仲有伴碟嘅炸花生同青瓜絲，好脆口。其中特別喜歡：牛筋，唔會一pat好稔，係可以咬嘅膠感牛腱，牛味唔錯，唔會太硬四喜烤麩，帶微甜，好吸味呢幾款涼拌料理愈食愈辣，愈辣愈惹味，加多罐冰涷汽水，真係無得頂。