鍋処雪舟 (已結業)

之前去過樓上間同鐵板燒雪舟，覺得食物、環境同服務都好合我心意，所以見有shabu shabu系列的鍋処雪舟都想試。環境一樣舒適寬敞，有獨立廂房，私隱度高。仲有窗邊枱同Bar枱可以揀。我同朋友分別揀左壽司午膳同鍋膳，set內都包茶碗蒸、小鉢、沙律、甜品同咖啡或茶。香菇芫荽雞肉茶碗蒸入口雞蛋軟滑，香菇味較出，仲有我喜愛的莞荽增添香氣。小鉢有蝦仁，仲有野菜沙律。雪舟極上御饍壽司九貫，有creamy帶甜的海膽壽司，三文魚，吞拿魚，帶子大塊又厚又鮮甜，蝦壽司和鯛魚等。壽司set附上的味噌湯和漬物湯可以揀3種，分別係大蔥醬油風味、昆布清湯同番茄濃湯。我揀左日本豚肩肉配番茄湯。日本豚肩肉肉質非常腍軟，纖維細緻，脂肪分佈均勻，沒有肉筋，肉味濃郁，唔食牛的朋友可以試試！蔬菜—金菇、冬菇、豆腐、菜等。另外仲有烏冬，整個餐都好豐富，好飽！甜品雪糕有士多啤梨、抹茶和椰子可揀。最後仲有茶/咖啡～好豐富，而且環境好舒適，想同朋友享受悠閑的午餐就最適合～