牛極 (大河道) (已結業)

好耐無出過荃灣，今次中午路過，見到好耐都無食過的牛極，就二話不說咁樣入去食啦。雖然現在係非常時期，但入到去都唔算無人，睇來同我一樣，大家都係來捧一捧牛極場。買完飛落完單，就搵個靚位坐底先，因為之後就去斟返碗好味嘅牛肉湯飲下。佢呢度嘅牛肉湯，味道唔算淡，味道適中，用來開胃一流。跟住就梗係裝定飯，等主菜牛柳來啦。呢度啲飯有得加紫菜碎，令到個口感更加充實。主菜到啦，牛柳肉質唔錯，因為佢係煎到一成熟，之後就放落鐵板上面由食客自行決定熟度，呢樣野十分貼心，因為個個口味不一，而且當中又有做廚師發辦的樂趣，的確係唔錯。當我加熱到咁上下，再落埋佢提供埋嘅岩鹽同黑胡椒，味道岩岩好！