釜之魂釜飯專門店 (淘大商場) (已結業)

前兩日去淘大商場睇完戲，商場有不同款式食店，見到有間門面裝修得幾有日式感覺既釜飯專門店，佢地主打鰻魚飯，而豬牛雞都亦有。鰻魚飯有兩隻，一個叫金魂，另外係銀魂，主要分別在於鰻魚醬汁，而每種亦有三款鰻魚size分別不同價錢。我個人比較重口味，所以選擇金魂，兩大塊鰻魚，魚肉夠厚，醬汁燒鰻魚非常香，而鰻魚醬汁仲可以免費添加，啱曬我。而飯係用日本珍珠米，軟硬適中有咬口，熱辣辣但無飯蕉，非常好味。另外點左五花豚肉釜，尼個飯有驚喜，一片片豚肉舖滿整個碗，份量十分多，豚肉肥瘦適中，啖啖肉，味道鹹淡適中，而且有半隻温泉蛋，流心蛋黃非常好味。小食方面好多選擇，黑松露玉子燒又香又帶點蛋甜味，黑松露夠曬香，整體唔錯。另外櫻花蝦炸豆腐香脆又可口，外面表面一層厚厚既櫻花蝦，包住中間既豆腐，外脆內軟，啱我口味。最後必食推介既髒髒炸香蕉，一碟兩條香蕉，外表沾滿朱古力粉，口感特別而且非常好味，作為飯後甜品一流。