心之食堂 (裝修中)

今日同朋友喺銅鑼灣搵嘢食，行到去時代廣場附近嘅耀華街搵嘢食，見到有間日本樓上餐廳幾得意，就入去試一試。 我哋嚟嘅時間尚早，人唔算好多，入邊坐嘅空間都寬敞，坐得舒服。 我哋叫咗個厚燒牛舌心，李小龍捲，一份海膽，一份燒雞軟骨，三文魚茶漬飯，心之魚生飯，一杯熱生薑茶，同一杯心之荔枝清酒特飲。 過咗五分鐘，一份海膽首先送上，海膽用青瓜同菜墊住，海膽味道好新鮮，味道亦都好鮮甜。 跟住三文魚茶漬飯亦都送上，熟嘅三文魚配上紫菜，芝麻等等嘅配料，同啲日本米同茶撈埋一齊食，味道好清新。 之後李小龍捲都送上，李小龍捲有四舊，入邊有炸蟹鉗，牛油果，魚子醬，蟹子同青瓜，呢個賣相好特別，手捲好似放咗喺張櫈上面，而且味道幾特別。 跟住厚燒牛舌心，同燒雞軟骨都送上，厚燒牛舌心有一串，呢條牛舌的確比平時係街度食到嘅厚，而且食落質感比其他更加好。另外燒雞軟骨有三串，燒雞軟骨燒得啱啱好，每一粒都好爽脆。 最後係心之魚生飯，成個魚生飯同個碟都係心形，而且有紅色同粉紅色嘅顏色點綴，而最上面嘅魚生款式都有好多，啲魚生好新鮮。