九哥車仔麵 (已結業)

朋友介紹，朋友話東大街新開咗一間車仔麵，必食推介有幾款都值得試，叫我去試試。這天大概三點鐘到啦，去到店舖都差不多坐滿人，店鋪面積好細，一條走廊形位置，擺放幾張枱。見到隔離兩個人都係食緊手工薯粉，其實我唔係好鍾意薯粉，不過即管試下啦！因為有手工兩個字，而我就揀三餸，醬皇豬大腸、QQ扎肉 和脆齋， 湯底要咗雲腿上湯， 醬汁自家沙嗲小辣。薯粉份量都幾多， 而且佢滑到比較難夾起，雖掛汁，但味道淡，口感好似橡筋咁煙韌， 下次食一定唔揀薯粉囉！豬大腸洗得乾淨，幾入味；QQ扎肉處理得好，唔會有雪藏味；脆齋就差啲，個皮脆但係乾身。 雖然要咗沙嗲醬，但仍然飲到雲腿的味道。下次再嚟已知道點嗌。