Seafood Stand (已結業)

我同老公點左「牛魔王」走芝士，「蝦兵蟹將」「炸魚薯條」同汽水一杯，「蝦兵蟹將」同「炸魚薯條」係合理時間到，味道講真，一般，我地點既「牛魔王走芝士」一直都未黎，第一次追，侍應話做錯左「黑松露和牛」仲同我講價錢貴啲，都有芝士，問我地等，定食呢一個，我走得芝士，即係話唔食得芝士，絕對唔係平定貴嘅問題，好喇，我地等，等左一陣，第二次，黎左「牛魔王」，點知都仲係有芝士，個侍應走返入廚房，我哋仲聽到個侍應喃喃自語問廚房識唔識中文，好喇，我地又再等。第三次，終於等到「牛魔王走芝士」，點知今次連帶住既係一隻活生生，係個Burger上走來走去嘅曱甴，我第一眼望到都打個特，個侍應嗰時望住我，已經冇嘢好講，飛奔返入廚房，其實等咗咁耐我地已經諗住走架啦，點知個侍應換咗另外一隻碟（白色既），將同一個burger拎比我地，果一刻我哋真係呆左。當然我哋以9秒9既速度離開餐廳，諗住俾錢啦，點知連張單都錯，收埋我「牛魔王」既錢，最後佢free左我一杯汽水同埋俾咗九折我地。我明白飲食業難做，但同一台客，咁樣出錯法，係咪太過分呢？走芝士真係咁難？