天魔 (已結業)

唔講真係唔覺VCITY一田入面有呢間小店 - 天魔，通常只會留意到天仁茗茶，就算留意到都冇衝動去試，今次終於都去左食，兩個人叫左個套餐，簡2個MAIN+2個小食加2杯飲品（部分小食、MAIN需加錢），最後埋單$126。特別一提，佢地初一、十五有素食提供，好似而家聖誕就推出左素威靈頓，認真特別。千層麵★★★★☆份量啱啱好，唔會太多太少，千層麵加埋D細滑薯嘅蓉、肉醬、芝士，入口層次豐富，但又唔會過分奶同太芝士，唔會食幾啖就覺得太膩同濟。肉醬分佈得好平均，味道幾好，但個人覺得如果可以再酸少少就更加惹味，推介推介。韓式炸雞漢堡★★★★☆個包真心有驚喜、誠意，個麵包有烘熱，食落係酥脆，唔係普通好淋嘅麵包。同埋意外地個炸雞、泡菜放落漢堡都幾夾，韓式炸雞外脆內JUICY唔乾身，泡菜酸酸地，加埋個沙律醬、蕃茄塊好夾。食落開胃又好味，正~朱古力Brownie★★★☆☆套餐入面加$5，入口個口感比較濕潤，唔知係咪放左入雪櫃。但食落都唔會太甜同太膩，重朱古力味，味道Overall正常。🌟總括：食物有誠意，味道好，服務好，價錢合理，絕對會ENCORE，值得支持嘅一間小店。