BYOB Coffee Roaster

營業中

休息中

#北海道帆立貝明太子意粉 🍝個醬用忌廉做底，加上明太子醬，香香辣辣，唔會過鹹，而且夠晒杰身，令每條麵都可以沾滿醬汁。成碟嘢相當creamy，意粉口感就尚可 。配料方面有兩粒刺身級帶子，相當厚肉，兩面有香煎過/燒過，做到半生熟效果。但個人認為香煎前可以印乾少少，因為都有出水嘅情況；煎嗰陣又可以落多少少鹽，除咗可以吊吓味，仲可以令帶子表面乾身啲，更加易做到表面焦糖色。另外店家仲加咗少少木魚絲、蕃荽、蘑菇等，可以增加口感，但味道上冇太大幫助。#蟹膏蟹肉意粉 🍝同樣用忌廉做底，醬汁creamy，意粉掛汁，加上蟹膏同蟹肉，每啖都充滿鮮味。但係怕腥嘅朋友又唔使擔心，忌廉令蟹味mild咗，所以唔會太濃，味道適中。配料方面有拆咗嘅蟹肉絲、蟹籽、兩隻蟹鉗仔同蘑菇等等，除咗可以增加鮮味，口感上大大提升。整體嚟講雖然冇明太子意粉咁驚艶，但以呢個價錢，都係好食足料嘅意粉，值得一試。#水牛城雞翼 🐓雞翼只限假日提供。醬汁一入口有種好衝擊既感覺，非常濃稠，少少辣味，可惜酸過頭。雞翼都偏大隻，肉質結實，不過外皮唔夠脆，加上醬汁後更易變腍。