Chotto Maki (漢威大廈) (已結業)

復古風格日式卷物！呢間新開嘅卷物分店新加日式麵食，當然要試吓去打下卡啦！餐廳位置就係Bakehouse旁邊，都幾容易搵。加上裝修顏色鮮艷，藍、紅色嘅對比非常突出，一眼就望到。座位唔算多，所以我哋買外賣喺餐廳影幾張相就算。個人覺得壽司、卷物比較出色，下次有機會嘅話都想試吓其他款式嘅卷物。Black Magma Roll $78- 呢款卷物有黑芝麻醬汁同帆立貝茸喺面，入面有吞拿魚茸加天婦羅脆脆。帆立貝同吞拿魚茸新鮮，味道幾鮮甜、一啲都唔腥，壽司飯調味恰當，唔需要額外加豉油Wasabi，不過黑芝麻醬唔突出。卷物握得幾實，夾落去唔會鬆散。推介！Aburi Salmon Sushi $48- 麵餐加$33可以有三件三文魚壽司，再加$15可以轉火炙。三文魚肥美，加上火炙嘅味道，逼出魚油香，好味道！Noodles $78- 相比起卷物，呢個日式車仔麵就遜色少少，冇乜特別。我哋揀咗豬骨湯蕎麥麵，配上芝麻乾海草、年糕條同蟹柳，面底份量好多，配菜就偏少，得兩條年糕，而且味道都係普普通通、不過不失。下次寧願試多幾款卷物。