嵐山日本料理

營業中

休息中

上完training，同媽媽去食日本嘢，揀咗呢間未試過嘅。媽媽食刺身，我就諗咗陣。雖然對壽司冇乜信心，但由於冇三文魚子/海膽蔥吞拿魚腩丼，結果叫咗壽司定食配牛肉烏冬。加拿大海膽、赤身都幾鮮甜，白身蝦、三文魚、油甘普通，白身嗰嚿有啲腥，另一嚿連皮嘅我麻麻地比咗媽咪，佢話好爽身。壽司飯調味都唔錯，握得有板有眼冇太鬆散或過實，而且啲刺身已經加咗蘿蔔蓉葱碎青檸汁豉油等調味。牛肉烏冬個湯底充滿牛肉味，肯定係件牛夠肥又靚嘅關係。肉就熟得滯有啲嚡，烏冬偏軟滑身幾好。其餘茶碗蒸蛋味okay但太水身，而且隻蝦係完全冇味。前菜辣汁蘿蔔牛舌夠腍入味。漬物蘿蔔牛蒡好有水份。麵豉湯夠香唔會過鹹或淡。媽咪個刺身全部厚切大件又肥，甜蝦都用大size，用赤貝少見，望落幾吸引。整體都okay，午餐冇加一，百幾蚊交足貨。