峇里堂

營業中

休息中

一走入峇里堂，好似去咗間小清新 cafe，冇一般印尼菜餐廳嗰種傳統嘅感覺，仲有大量狗狗嘅相，店主應該係愛狗之人👍。超鍾意食㗎央，毫無懸念首先就點咗雙色㗎央多士，雖然係雙色，但其實味道冇咩分別，但視覺上係靚嘅。牛油同咖央醬，一鹹一甜，夾喺微溫香脆嘅多士入面，呢個配搭真心好正。之後嘅雞肉串燒同小食拼盤都係正常水準，隨串燒奉上嘅沙爹醬夠香夠濃；拼盤有蝦丸，魚餅，素春卷同蝦片，每一樣都係惹味之選。印尼咖哩牛腩飯餸多過飯😍，通常食開星馬咖哩同印度咖哩，今次試印尼咖哩，感覺上除咗香濃之外就係比較鹹。加錢叫咗金貝飯底，呢種飯係用香茅，檸檬葉，薑黃同椰汁等蒸煮六個鐘而成，有種獨有嘅香味，可惜我哋叫嘅係咖哩飯，醬汁好多，就掩蓋咗飯本身嘅味道😂。最後食埋名物峇里堂珍多公雞冰冰，其實係食得嘅珍多冰，加個雪糕球，再用公雞碗上。呢個賣相一流，紅黃綠配料加上粉藍色嘅海鹽雪糕，非常吸睛，味道亦佳。公雞碗好大，兩個人分，剛剛好。