老鍋台式火鍋 (京都廣場) (已結業)

朋友知道我好鍾意食酸菜白肉鍋，所以今次特登帶咗我去食呢間老鍋，佢話呢間嘅酸菜白肉鍋相當出色。酸菜白肉鍋$158呢個鍋入面嘅材料豐富，有大白菜、豬五花肉、粟米、寬粉、菇同埋蕃茄等。鍋底嘅酸菜味做得好出色，每樣食材放入去都可以吸收到濃濃嘅酸菜精華。豬五花肉本身有醃過，好香。呢個湯底我最鍾意就係啲款粉條，彈牙得黎又唔太難咬，仲充滿湯底嘅香味。鹽酥一口豆腐$48有好多粒，都幾抵食。每粒外面都炸得好香脆，入面就超滑，調味又香。美國梅花豬肉$118有10塊，唔會太肥，肥瘦適中，啲豬肉味好香。3秒響鈴卷（半份） $48餐牌上面寫佢係即叫即炸，好似好正咁，所以就叫咗半份黎試吓。半份係有四條嘅，每條大大條，真係淥3秒就食得，索晒啲酸菜白肉鍋湯底味，超正。冷泡白桃烏龍茶$28見到餐牌寫呢個冷泡白桃烏龍茶味道清香，可以潤燥、排毒，就叫黎試下啦。飲落第一啖有好香嘅白桃味，之後越飲啲烏龍茶味就越出，都幾值得飲。