百樂小館 (已結業)

朋友約食飯，黎到尖沙咀呢個商場，朋友話好耐無食過潮州野，咁一於試下百樂小廚。食潮州野又點可以無凍魚呢？呢碟潮州凍黃油烏魚就岩晒啦，首先黃油烏頭比一般烏頭高質，魚油甘香不在話下，油而不膩，魚肉更加比一般烏頭魚有肉質又夠滑，煮既時間剛剛夠，令肉身滑上加滑，而凍食令肉質收縮，食落更口感豐富。餐廳備有一份豆醬，能夠將魚肉鮮味更提昇。跟住係另一味潮州菜，金華大芥菜煲，金華帶鹹又帶香，金華醬汁充滿豬油香，令簡單大芥菜更出色，大芥菜經過與金華火腿炆後，變得較淋身又夠入味，又香又甜，加上用煲仔上碟，能夠保持菜的溫度。天氣夠凍又點少得腊味飯呢，呢煲腊味飯用料充足，腊味份量足夠4-6人吃，而腊味質素不俗，除了乾身外，基本上與新鮮材料無異，夠晒香滑充滿家鄉風味，而飯味濃，又沾上腊味香味，真係食得合時又夠暖胃呀。