滾得囍宮廷火鍋小炒 (已改名) 查看

估唔到北角馬寶商場有個咁有宮廷氣派既餐廳，專食火鍋，大約7點黎到已經好多人食緊。康熙花膠雞湯鍋，會有店員幫忙開爐，鍋料有半隻黃油雞(大概已有8成熟)上面舖上一層花膠，等湯滾起後，店員會再次黎到幫客人剪花膠放入湯底，更話俾我地聽可以先飲左花膠湯，再落雞同淥野食。花膠雞湯既花膠好滑溜，個湯亦好甜，食完成個鍋都唔覺好口乾，值得一讚，雞亦啖啖肉。清酒鮮牛肉，擺盤好靚好grand，每片牛既紋理都好靚，脂肪同肉既比例都均勻，放係湯拖十秒左右就岩岩好，非常嫩滑。魚皮響鈴雙拼，唔係一般火鍋店既質素，每塊魚皮都係完整大大塊，就咁食香脆有魚香味，浸一浸雞湯食又有另一番風味。響鈴亦係大大條，有種鬆化既感覺。牛柏葉洗得乾淨，淥既時間唔好太耐，就會有爽口既感覺。再沾少少自己配既豉油，更吊出味道來。最後2人share 左個白飯同埋雞蛋，撈湯食又正，配下牛肉同雞食又正，非常滿足既一餐，店員既服務亦都非常周到，真係好似有宮廷既享受咁。