滄浪亭

營業中

休息中

女朋友返工放lunch, 同佢一齊喺公司附近覓食。之前佢都食過呢間話啲麵好食，於是帶左我黎試菜。匯合佢前上黎做下資料搜集，除左話服務態度差外，大部分都係話好味嘅正評；一間舖能夠做得住，一定係好好味先夠資格黑人面，所以都期待一試。去到見餐廳處於平台一個轉角舖位，果然係細，得四張枱，我地排第三四，不過都只係等左十五鐘，尚可接受。一入座就同櫃枱後老闆娘落單，見佢笑容滿面咁覆單，侍應又殷勤招待其他客人，服務態度冇問題。我地叫左拍青瓜，嫩雞煨麵同紅燒軟排麵，唔使十分鐘都陸續上齊菜。先試拍青瓜，個汁酸甜開胃，瓜皮爽口瓜身夠腍，好食！ 再上紅燒軟排麵，有啲似豬軟骨，一試夠入味夠腍，麵條又彈牙，好食！最後試傳說中奶油湯底嫩雞煨麵，一上見到奶白色加舖滿菜同雞肉已經好吸引，一入口嗰種奶油香滑口感冇得頂，絕係對我呢啲奶油控嘅恩物，女朋友一試都瞪大眼話好食呀。因為太肚餓，開餐前唔記得影相，只係影左中途一張；呢餐埋單百二蚊有找，滄浪亭絕對係抵食好味，值得再返試嘅好店。