香港達人 (宇晴匯) (已結業)

一個人食晏，諗住食日本野，點知等X民等好耐，等到肚餓都仲未有位，頂唔住，所以走咗去睇吓仲有咩其他野食，經過見到呢間都幾多人係入面，就試試佢啦!由於一個人，安排咗我搭檯，點了焗椰香咖哩雞扒飯午餐配羅宋湯、餐飽、熱好立克。我成日覺得茶餐廳係香港精神，講求快、靚、正，呢間餐廳做到首件事-快! 落單唔夠3分鐘，全部到齊我檯面!對於正處於饑餓狀態嘅我，實在係佳音。至於靚方面，講真，快到咁就唔會靚得去邊啦，都算過得去。食物質素方面，羅宋湯比我預期好味，西芹、蘿蔔、蕃茄、菜、肉嘅材料都食到。個餐飽係西餐包，唔係熱嘅，不過唔熱仲好，我唔鐘意有d餐廳用微波爐整熱d包仲難食。個焗飯就一般啦，冇咩椰香，亦冇咖哩香，可能太淡啦，痴住焗兜嘅飯仲d飯焦添，可能一直焗住，所以飯同雞肉都比較乾，但都欣賞佢有加蛋在飯之間。總括黎講一般般啦，呢餐$52。