XTC Gelato (已結業)

今日同男朋友出尖沙咀行街，天氣好熱，經過XTC Gelato就即刻想買黎食解暑。原來佢屬於本地既手工低脂意式雪糕，食完可以減輕罪惡感。佢提供好多種口味，普通味至特別味都有，可以揀杯裝或者筒裝。雙球雪糕$50，我地都揀左兩隻味黎食。 我揀左螺旋藻布朗尼同百利甜酒士多啤梨；男朋友就食雲尼拿同朱古力，都要筒裝既。螺旋藻布朗尼每啖都食到布朗尼，有得咬下，螺旋藻本身無乜味，全靠布朗尼帶味，好味。百利甜酒士多啤梨香甜幼滑，食得到百利甜酒味，同士多啤梨味幾夾，士多啤梨味唔假又唔會好甜，正。雲尼拿同朱古力味雖然係大眾化既味道，但基本款實無死，兩款都好食。雲尼拿有雲尼拿籽，朱古力唔係死甜個種，抵讚。