申、居酒屋 (已結業)

早排到訪了依間位於天后新開的居酒屋，主打日式串燒和炸串，亦有提供廚師發辦。午餐均配薯仔沙律、味噌湯、茶碗蒸、甜品或咖啡，再跟配白飯或紫菜烏冬。前菜亦毫不馬虎，薯仔沙律是一球薯蓉，裏面有薯仔粒、火腿、青瓜、甘筍，並用沙律菜墊底，加上沙律醬和麻醬。茶碗蒸相當有驚喜，滑嫩嘅蛋上竟然鋪滿三文魚籽，啖啖鮮甜魚油。二重定食（燒黑豚肉、南蠻炸雞）當日黑牛小排缺貨，以黑豚肉取代，豚肉用鹽燒，肥瘦均勻，咬落去仲有油脂和肉汁。好鍾意炸雞皮薄，炸粉不會好厚，外層香脆，裏面肉質滑嫩，配上酸瓜沙律醬，可以解膩。雜錦串燒定食（蒲燒鰻魚、比目魚、黑豚肉、免治雞肉棒、秋葵）蒲燒鰻魚醬汁香濃，肉質肥美且柔軟，不會食到有骨刺。比目魚燒得焦香，但肉質又不會乾，裏面口感綿密。免治雞肉棒肉質軟嫩入味，裏面仲有雞軟骨，配上生蛋黃和醬油更惹味，淨返的醬汁我用來撈烏冬，同樣好夾。到最後擺放雪糕的碗都非常精緻，仲有得揀口味，分別係芝麻味和紅豆味，我選擇了紅豆味，裏面仲有粒粒紅豆。整個午餐相當豐富，環境高雅舒適，性價比亦好高。