釜之魂釜飯專門店 (淘大商場) (已結業)

今日同朋友嚟到九龍灣既釜之魂食晚飯。之前有朋友叫過外賣，對佢既釜飯評價非常唔錯，令我地對堂食既質素更加期待！我地叫左汁燒牛肉釜、鐵板燒雞魂同練梅凍蕃茄，釜飯只要加$18就可以升級做套餐，有前菜（泡菜味芽菜）、麵鼓湯同一杯野飲，係咪好抵食呢！先講吓鐵板燒雞魂。一到餐既時候，大大塊既雞扒就映入眼簾，雞皮燒到金黃色，咬落去口感嫩滑，肉汁豐富，加上燒汁既襯托，水準十足！至於汁燒牛肉釜呢，牛肉同配菜既擺盤非常精美，而我最鐘意既係燒牛肉同溏心蛋，牛肉大大粒，燒得岩岩好，牛味十足！而呢個餐呢我朋友就加左$18既茶漬飯。店主非常貼心，預先將茶漬飯既食法教學貼左係每一張台到，令未食過既朋友一目了然。茶漬飯既食法係，首先店員叫我朋友夾起飯上既配菜，之後佢會將煲熱既湯倒入飯內，最後冚蓋焗佢1-2分鐘就食得啦！除左熱湯，茶漬飯亦配有紫菜碎、秋葵同飯素（海苔、鰹魚及芝麻)，咁多種食材混合埋一齊，口感層次豐富，令人一吃回味！最後係練梅凍蕃茄，佢既做法十分特別，將蕃茄去皮，並將佢浸係梅汁入面一段時間，令到成個蕃茄都吸收哂梅香。爽口多汁既蕃茄配上酸酸甜甜既梅汁，非常開胃。初夏來臨，食佢就最適合不過！