Give Me 5 (已結業)

上個月禁晚市前黎食，依家終於記得打返個食評。當日同男朋友去開觀塘，見到依度2小時任飲任食，就黎左啦。首先講講空間，黎到真係有種好高級既感覺，環境清靜，空間好大，連張枱都特別大。男朋友叫左意大利西西里茄醬意大利粉脆炸軟殼蟹，而我叫左澳洲肉眼扒配野菌汁。唔知係咪因為隔離飯香既原因，我中意男朋友碟意粉多啲，份量適中，軟殼蟹夠脆同好香。牛肉都好好食，肉質唔錯，配合野菌汁係最佳之選。之後就係任食海鮮，我地拎左好多燒帶子同扇貝，特別推薦大家食扇貝，啲汁非常好味及鮮甜！其他海鮮亦唔錯！好期待晚市解禁後再去過！